Hum mein se kai logon ka sawaal ye hota hai ki Resume aakhir hum banate kyun hain? To chaliye seekhte hain, humara Resume banane ka kya purpose hota hai?

  Hum chahe Fresher ho ya Experienced, Resume banana sabhi ke liye bahut zaruri hai. Humara resume humare job ki taraf pehla kadam hota hai. Isliye ye pehla kadam humein bahut careful hokar lene ki zarurat hoti hai. 

Kya Resume Sabhi Tarah ki Job ke Liye Zaroori Hai? 

Ji haan, chahe koi academic job ho ya non- academic har tarah ke job ke liye Resume compulsory hai. Chahe hum kisi Private company mein job ke liye apply kar rahe ho ya phir kisi MNC (Multi National Company) mein; har jagah application process ka pehla step Resume hi hota hai.

Hum mein se bahot se logon ko nahi pata hota ki kai leading universities aur colleges, Admission process ke liye bhi Resume avashya maangti hain. In baaton se humein samajh jaana chahiye ki Resume aajke is daur mein Job ho ya Education sabhi ke liye bahut important factor hai. 

Resume Banane ka Uddeshya : 

Jab bhi koi company apni vacancy nikalti hai to wo apne job description mein job profile, qualifications, skills, experience, responsibilities sab kuch mention karke advertisement nikalte hain.

Uske baad us company ke hiring authorities humse hamara Resume maangte hain. Humare resume ke adhaar par hi ye decision liye jaata hai ki hum us job ke liye eligible hain ya nahi.

Iska matlab hai ki humari eligibility ya in-eligibility humare resume se hi pata chalti hai. Humare resume ke adhaar par hi humein aage ke process ke liye bulaya jaata hai. 

Lekin kabhi kabhi humare us profile ke liye eligible hone ke baavjud bhi humein shortlisted nahi kiya jaata hai.

Kya humne kabhi is baat par vichaar kiya hai? 

Iska ek simple answer hai, humara un-professional Resume.  Isliye humein Resume bahut hi careful hokar, concise manner mein banana chahiye. 

Resume Kyun Zaruri Hai?

Hum mein se bahut se log aisa maante hain ki Resume sirf interview ke liye bulaane ke liye ek document hai. Lekin sach to yeh hai ki Resume ek aisa tool hai jo humare baare mein bina kuch bole hi bahut kuch bolta hai. 

Agar hum short mein baat karein to Resume humare career ka ek snapshot hota hai. Aur ye snapshot kai maayno mein humara future decide karta hai. Yahi snapshot interviewer ke saamne humein effective tarike se present karta hai. 

Conclusion:

Upar diye sabhi information ke baad ab humein koi doubt nahi hona chahiye ki Resume ka kya purpose hota hai aur ye humare liye kyun aur kitni zaruri hai. Kabhi Kabhi humare deserving hone ke baad bhi humara role kisi aur ko de diya jaata hai.

Aisa isliye hota hai kyuki hum apne first impression par dhyaan hi nahi  dete. Nayi aur behtar opportunities ke liye, apne career ko grow karne ke liye aur saikdon ki bheed mein se khud ko alag rakhne ke liye humein ek bahut hi strong, impactful, relevant aur authentic resume ki zarurat hai.

Seekhiye Mobile se Resume Banana  👇👇