Apne Dream Job ke liye interview ka call aana, humara apne career ki taraf sahi direction mein ek aur step hota hai. Lekin, ye humare safar ka last step nahi hota. Aage badhne ke liye humein is round ko pure Josh ke saath clear karna hoga. 

Is blog mein hum seekhenge ki wo kaun se important skills hain jo interview ko crack karne ke liye compulsory hain. To chaliye seekhte hain, most important effective interview skills:-

1. Company ke baare mein research karein:

Is skill ko humein ek advice ke taur par nahi lena hai, ye ek bahut hi important information hai. Hum jis bhi company/organisation mein interview ke liye jaa rahe hain, usse related humein har chhoti badi details ke baare mein pata hona chahiye.

Maximum cases mein humein job offer na milne ka ek reason ye hota hai ki hum bina company ke baare mein research kiye job interview ke liye chale jaate hain.

Isliye humein company ke baare mein bahut achhe se research karke aur jis department mein hum job role expect kar rahe hain, us department se related bhi sabhi information collect karke hi interview ke liye jaana chahiye. 

2. Job description ko analyze karein:.

Company ke baare mein research karne ke baad sabse zaruri hai ki hum job description ko achhe se analyze karein. Job description mein mention kiye hue sabhi points ko consider karte hue apne focus areas ko note karne ki zaroorat hai.

Un points mein se kisi se bhi related agar humare paas experience hai to humein uske baare mein interview mein mention zarur karna chahiye.

3. Common interview questions ke liye ready rahen:

Lagbhag sabhi Interview mein kuch questions common hote hain. Isliye zaruri hai ki hum un questions ki list banakar unke answers ki practice karein. Jaise: Introduction, humein aapko kyun hire karna chahiye?, Aapko ye job kyun chahiye? , Aapka long term goal aur short term goal kya hai? Etc. 

4. Punctuality:

Humein professional dikhne ke liye humesha time par ya time se pehle hi interview ke liye appear hona chahiye. Humare interview ke liye late pahuchne par, humein interview mein appear hone se pehle hi reject kar diya jaata hai. Iske liye humein apni punctuality par bahut dhyaan dene ki zarurat hai.

5. Resume ki rehearsal :

 Kabhi Kabhi interviewer ka pehla question hota hai, Apne resume ka description dijiye. Iske liye humein pehle se hi taiyar rehna hoga. Isliye iski preparation humein pehle se hi karni chahiye, jisse ki jo bhi hum present karein wo crisp aur clear ho. 

6. Clear aur Confident answer:

Humein clarity of speech aur clarity of thoughts ko maintain karna hoga, ye skill humare confidence ko show karta hai. 

7. Body Language:

Interview ke time par important factors mein se ek hai: Correct Body Language. Psychology ke according, humari body language humare personality ko bahut achhe se define karti hai.

Iske liye interview room mein entry karne se lekar interview ke khatm hone ke baad bahar aane tak humein apne attitude aur body language ko professionally maintain karna hoga. Interview ke dauraan humare face ki smile humare positive attitude ko show karti hai. 

8.  Eye Contact :

Jab bhi hum interviewer ke questions ka answers de rahe ho to, sabse zaruri baat hai ki humein sabhi answers interviewer se eye contact match karke dene hain. Humara ye attitude,humare confidence ko show karta hai. Agar hum interviewer ke saamne idhar udhar dekhte hain,to ye humara lack of confidence show karta hai.

9. Attentiveness:

 Interview ke time humein attentive rehne ki zarurat hai. Interviewer ki baaton ko dhyaan se sunna aur unke pace of talking ko match karte hue answer dena humare liye sabse important task hai. Achhi communication skill, interviewer ko bahut impress karti hai. 

10.  Prepare your questions set:

Har interview ke end mein humse ye questions zarur pucha jaata hai,ki humare paas unke liye koi questions hai ya nahi. To iske liye humein pehle se hi prepare rehna padega. Iske liye zaroori hai ki hum apne questions ki list bana le. Lekin, humein questions company aur job profile ke relevant hi puchna hai. 

11. Be humble and show Gratitude:

At the end, ye matter nahi karta ki humara interview kaisa gaya ya phir iska kya result hoga. Ye humari duty hai ki hum humble aur polite rahen. Interview room se exit lene se pehle humein interviewer ko unke time aur consideration ke liye gratitude show karna nahi bhulna chahiye. 

Conclusion:

Hum mein se bahut logo ko lagta hai ki interview ke liye call aana matlab humari naukri pakki. Lekin ye ek bahut bada mis-conception hai. Interview ek bahut hi important aur difficult task hai. Ye humare job ki taraf humara final step hota hai. Isliye is final step mein humse koi galti na ho iske liye humein is par bahot focus karne ki zaroorat hai. 

Interview Preparation Se Judi Zaruri Tips 👇👇